Church Management Seminar
Lunglawmhnak: Europe ram ah Chin miphun hruainak in dirh hmasa mi Church hna nih kum hra lengkai ka ceih ti lomi Church management seminar ah nan ka sawm cio cu Pathian he a lengtti tthan ko kaa lawh ter i ka lung a hmui ngaingai. Pathian ka lawmh tuk leng ah a ka sawmtu khrihfabu nan cung zong ah lawmhnak tampi ka ngei. Hi nih hin Europe ram ah Chin miphun hruaimi institution a hrin cang ti a fianter. Chin ram institution a rak simi CACC, CARD, ZPBA, LBC-Yangon le Carson Baptist Church, Kalaymyo hna zong nih atu seminar ah chuahpimi hruaining tungtlang te hi an hman ve cang caah ramchung-ramleng kan ihruaining aa fun kho cang ti zong a langhter i cu ko cu kaa lawmh khunnak a si.
Ceu Mang
Honorary Pastor, IBC, Sandnes; ZBC, Egersund, Norway
Church Management Seminar
1. Zion Baptist Church, Egersund, Norway March 28, 2009 kl 12:00-17:00
2. Immanuel Baptist Church, Sandnes, Norway April 18, 2009 kl 11:00-17:00
3. Nordjylland Chin Church, Seaby, Danmark May 2, 2009 kl 16:00-21:00
4. Stavanger Chin Church, Stavanger, Norway August 8, 2009 kl 12:00-17:00
5. Grimstad Chin Baptist Church, Grimstad, Norway August 30, 2009 kl 13:00-18:00
Church Ihruai ningcang cathluan Chuahpitu: Ceu Mang
Biahmaisa: Chin ram cu mah thazaang in khrihfabu dirhnak phung (self sporting Church) le democaracy in ihruai ning phung thlaici a rak kan vorhtu American Baptist Mission (ABM) rianttuanak in khrihfa ram ah aa rak ithlengmi miphun kan si caah kan phak ram poah ah Chin ram a rak sersiamtu hmasa hna tlaihchannak nih Baptist biakinn theu a kan panhter hmasa ve lengmang. Baptist Church a um lo ahcun bu dang kan fuh ve fon, Chin khrifa poah biakinn panh lo kan um lai lo tiah ka zumh. Cu ti ning cun ramza phan nih Chinram khrifa nun kha ilak zau in kan phak khua poah ah pumhnak program le bu kan iser ve.
A pawi deuhmi tu cu Malaysia le India fellowship nih kan lemkaw chanza a hmun ding Church dirh le Church hruaining leitu ruat lo in Europe phan poah nih ipumhnak men fellowship tu in kan thawk ai. Fellowship long in cun Khrihfa nun taktak kan ilak kho ti lo, zumhnak tlaihtleng kan ngeih lo tik ah kan phak ram cozah zong nih pom awk a ttha ti lo, hmailei ca saduhthah zong kan ngei lo, 1/10 zong kan pe duh fon lo, hawikawmhnak men lawng a si caah kan ibiatak kho lo, Khrihfa nuncan ziaza lei zong a kan hruai thiam fon lo.
Kum nga ruk a hung ruah tik ah zei vision zong ngei lo in pumhthlorh pumh phung a si lo zia kan hung fiang, Norway Baptist Union nih fim an hung kan chimh, a kan tlawng kai kho kan pa le nih ruahnak an hung kan cheuh cio tik ah Church lawng nih Khrihfa nun a kan cawn piak khawh ti kha kan hung fiang, cu caah fellowship cu Church ah thlen a hau tiah ruah cio a si. Church cu kan thinlung, kan ruahnak, kan caan le kan chawva (1/10) kan peknak hmun a si caah kan ttanh, khrifa ttha isersiamnak le Chin miphun sinak kilkamhnak ca zong ah thuam ttha bik a si kha kan fian cang caah Europe lei cu 2008 hnu ah Church dirh hram ithawk cio a si.
Baibal chung a hmasa bik Khrihfabu: Baibal bia chung ah a hmasa bik khrifa tiah rak auhmi hna cu Antiok Khrihfabu an rak si ti cu zapi theih a si. Thlarau le zumhnak in an rak khat, hremnak, harnak le thahnawnnak lak ah ralttha ngaiin khrifabu an rak dirh. Bawi Jesuh cu Mesaiah, a kantlanhtu le a kan khamhtu tiah an rak aupi. Lung rual te le lung nge tein khua an rak khangtti, cu lio Judah ram mangtam a rak tlun zong ah lungrual tein phaisa an rak thawh, an rak bawmh hna. Chiattthat an ton ah an rak ihrawm. Cu cu Church dirhtu hmasa hna nih an rak zulhmi laam a rak si. Atu kanmah ve zong nih cu nun cu izoh in zei tin dah Church kan dirh lai, kan ihruai ve lai ti kha baibal lei hmuhning leng ah Global mit in fainter kaa zuam ve lai.
Church dirhnak ah a herhmi hna: Kan phak ram Church dirhnak ah a tungtlang in a tanglei hna hi a herh hmasa tiah ka ruah.
1. Zumhnak ah aa khat i mah lungtho in Church dirh a duhmi Khrifa mirun um hmasa a herh.
2. Zaanghlei cawi in member khawmtu le a herhmi tawlreltu hruaitu ttha hna an herh.
3. Ram mi thar (New citizen) in cohlan kan si bang cozah sin ah register tuah a hau.
4. Kan phak ramah National level in an ngeihmi Church base Organization ah ipeh a biapi fon.
5. Pathian ramkauhnak, Chin miphun rualremnak le kan phak ram cozah upadi phung tlinnnak caah phunglam ttha ingeih a biapi.
Hruainak phunglam ttha a herhnak: Hi hna lak ah Global mit in a biapi bik rua tiah ka ruahmi cu hruainak phunglam ttha ingeih a si. Zei cah tiah phunghram cu ram le mipi a kan cawmkengtu ttha bik a si caah a si, kan dirhmi bu a nunnak zong Pathian pin ah phunglam a si ko. Singopre khi an ram in zei hmanh a chuak lo. Kawl ralkap kai hnu 1965 long ah dirhmi ram a si, An ihruainak phunghram a tthat caah a tthangcho ciami ram (developed country) an si. Kanmah kawlram khi vulei ramkip lak hmanh ah vulei chung chuak a rumlei kan si lai nain ram sifak cazin ah kan umpeng hi hruainak phunghram chiat ruang ah a si ko. America mipi nih hi dirhmun a kan phaktertu le US mipi a kan cawmtu cu kan phunghram a si an ti peng.
Cu caah pumpak le chungkhar in mibu le ram ningpi tiang dinnak laam ah luhpitu, dawtnak le rualremnak a sersiamtu, a tthancho tertu le a nuamhtertu taktak cu hruainak phunglam a si. Church pakhat kan dirh ve zong ah vulei ram a si bang kan phunglam a tthat lo ahcun dinnak a kan panhpi thiam lai lo, rualremnak a um kho lai lo, dawtnak a leng kho lai lo, daihnak ram a ngei lai lo, kan buai peng lai, kan hrokhrol peng lai, cu leng ah kan nunphung a tlau lai, kan miphun tiang in kan thlua rih lai ti kha vulei tuanbia nih fiang tein a kan chimh cang. Cu tthandon cun kan luatnak ding ah kan si khawh tawk Church ihruainak (Church management) ah kan ingeih awk phunglam tete a tungtlang in kan dihlak kan iceihtti hmanh hna lai.
Chruch ihruainak ah a herhmi phunglam a tungtlang: Church ihruainak ah atungtlang in a tanglei hruainak phunglam hna hi Khrihfabu tambik nih hman cio a si.
1. Phunghram (Consititution)
2. Phungtteng (By-law)
3. Hruainak phung (Act)
4. Zulhphung (Rule and regulation/Manual)
Note: A tangmi HIKA ah relding.
