Chin American Forum

CHIN AMERICAN FORUM Source: Metkhuabo mail on 2 APR 2010   Refugee zungah local le national level kan tuannak ah kan hmuhmi cu Kawlram lei ara mi pawl hi kan cotin ding kan coting dih lo ti hi asi. Kan cozah le refugee kan sinak ram cozah hna nih an duh paoh in an kan tuahnak ah ramtha kan phak hnu zongah kan cotin ding kan cotin lomi hi apoi ah kan chia tuk tilo. Cucu, kan co ding taktak kan itheih lo caah asi bik. Cu caahcun, Chin American Forum hon thawknak hi asi. Chinmi hna US mipi sinah tluang te luh khawh le cotin ding co ding—integration—hi Chin American Forum nih aa tinh bikmi (primary goal) cu asi. Cucu, ruahnak cheuh (technical assistance pek) le tanpi (advocate) nak in tuan itimh asi. Ahlei in mitampi umlonak khua aphanmi bochanawk ngeilo mi kan hawi le hna hi siaherhbikmi cu ansi. Cu lengah kan i tinhchihmi (secondary goal) cu United States ummi vialte bia kan iruahnak le thawng kan ithanhnak ca zongah asi fawn. Zapi umnak phanmi zong kan contin ding aa thei dih lomi kan tampi. Cu lengah US ummi nih kan ton cuahmahmi thiltha he thilchia he i ruah le ruahnak icheuh cio hi kan herh ngaingai ko. Chin American Forum umtu ning cu atang lei bantuk hin asi.   1.  Chin American Forum Zaanghleicawitu Chin American Forum hmang in refugee lei ah professional contributor 4 nih ca tial le biahalmi pawl leh asi lai. Aherh ahcun tam deuh chap asi te lai. Cu lengah hi Forum i aa telmi paoh nih mah le hmuhtonmi cio ichimh ruahnak le ruahnak i cheuhnak hmun asi lai. Moderators le zulhding phunglam zong tha tein anum.   2. Kan I Ruah Ding Pawl Kan iceih laimi thil tampi lakah aatel dingmi cheu khat hna cu hihi ansi: A phanthar pawl caah: ·         Ramdang in US rat i timh tikah aherhmi pawl ·         US refugee zung phanh tikah zeidah co tin ding le rian (rights & responsibilities) kan ngeih ·         Kan phaknak khua in ithial (colh) duh tikah ·         Rian kong he aa pehtlaimi paoh—abianaah, ruahnak cheuhnak, rian interview ah umtu ning tbt, le work permit kong ·         Refugee zung nih tha tein an kan zoh lo tikah ·         US cu i thialkaam afawi te caah khui ka ahdah rian atam bik tbt ·         Mi ralchia deuh pawl thapeknak (empowerment)  A phanhlun  deuh pawl caah: ·         Kan chungkhat pawl US ra ding in oh kan duh hna tikah ·         Green Card sawk tikah ·         Citizenship sawk tikah Culengah, US aphanmi Chinmi nih kan iceih aherhmi vialte ceih ding asi fawn lai. Abiana ah, fimnak cawnnak (education) lei, phaisa (finance) lei, family i zohkhenh ning (sex education tbt), inn cawknak kong le Chin American nih kan tonmi issue vialte aa tel lai. Atawinak chim ahcun, Chin American Forum hi bia iruah sawhsawhnak siloin US ummi hna rian kan tuannak hmun siseh ti kan duh. Chin American Forum hi refugee pawl kan dih hnu zongah US ummi hna bia kan iruahnak, thawng kan ithanhnak le rian kan tuannak siteseh tihi saduhthahmi asi. Aherh ahcun website zong kan tuah te lai.   3. Kan Bawmh Ding Pawl Bawmh kan ti tikah aphan thar deuh ca bik khi asi. Chin American Forum nih Lai holh hmangmi lawng si loin, Chin asimi paohpaoh bawmh an herh ahcun bawmh dih ding asi. Laiholh hmang lo pawl cu kan Forum ah an itel ve lai lo caah mah le pawngkam ummi cio kha hi Forum aa telmi nih kinceh an hau lai. Culengah, Vawlei cung hmun kip ra mi miphun dang zong bawmh aherhmi le kan bawmh khawhmi hna nan pawngkam ah an um ahcun bawmh thiamthiam ding ansi lai. Ziah tiahcun, Chin miphun hi mi nih bawmhmi lawng kan siding asi lo i mibawmtu zong kan sive ding asi.   Chin American Association Chin American Forum ah kan herhning zohchun in aphanthar pawl caah tanpi (advocate)—abiana ah, local refugee zung, national refugee zung le US Cozah sinah phone chawnh piak le catial piak tbt—aherh ngaingai ahcun Chin American Association hi kan thawk te lai. Ziah tiahcun Democracy ahcun pumpaknak in abu min in rian kan tuan tikah alet in hma akal tawn. Idea cu aum cang i aherh ahcun von thawk lawng khi ataang ko. Chin American Association zongah Laiholh hmangmi lawng siloin, Chin vialte huap in tuah asi te lai. US Cozah sinzongah non-profit organization in hmatpungtin te ding zong khi ruahmi cu asi, tuah ava si te ahcun. Chin American Association zong hi Chin American Forum bantuk in refugee kan dih hnu zongah kan nunphung le zalam kilvennak, kan miphun ca rian kan tuannak le kan i funtomnak siteseh tihi saduhthahmi asi.   Chin American Forum luh aduhmi paoh nih nan min, nan email address le nan umnak khua le peng tling tein chinamericanforum@ yahoo.com ah kuat ding asi lai. Nangmah lawng si loin US hmunkip ummi chungkhat le hawi le vialte zong rak chim cio hna u, ahlei in anmah lawng kaa dangah aphan ding le khuasami pawl. Hi rian hi zaanghleicawi in tuanmi asi caah nan duh ning in thil akal cio lo zongah, itheihthiam cio ding hi abiapi ngaingai te lai. Pathian nih lam kan hruai hram ko seh!   Upatnak he lungthiang tein,   Chan Hnin Thui Chin American Forum Maryland, USA ================= Life is like a book, everyday is new pages